年度大檢

又入院了！但各位不用擔心，今次入院，實為覆診。因為上年照胃鏡割左兩粒息肉，所以今年要再照睇下佢有無再生番出黎。星期一放工後入院，匆匆食完飯就打的去醫院（為補償十二點後水都唔俾飲，我一個女人仔叫左一個沙薑雞煲，呵呵...仲食晒D雞添，勁！）因為個天往往會係你無帶遮的日子落狗屎！

估唔到，入院都要等，聽醫院D嬸嬸講話如果唔好彩，就要等成個鐘先有得你上房！嘩！係香港人越來越有錢所以住私家醫院，定係香港人身體越來越差呢！今次claim公司保險，upgrade自已住5人房，仲係窗口床添（不過原來隻窗對正對面大廈，又適逢農曆7月，所以我都無開窗簾）

原來照胃您唔駛換手術衫，所以我就咁著住自已套睡衣入手術室，感覺好怪呀！由於有上次經驗，今次無咁驚，所以我就係護士打訓覺針之前眼仔碌碌四圍望，原來對住張床有個大mon俾醫生睇住照，其實都幾似打機咁！跟住就噴D好苦的spray入我個喉嚨，因為上次試過，所以我知有幾苦，護士講解時被Dr. Li踢爆我上次試過，護士即刻話：“咁你知有幾苦架啦”我答：“知...”跟住我含住啖野，唔吞（因為唔知吞唔吞得），護士就問吞左未，我無答，因為果時先知吞得，咪即吞囉，此時，Dr. Li答道：“佢苦得滯講唔到野”haha...我越來越鍾意呢位醫生！護士多口加句：“雲呢拿味架喎！”原來，護士也會講大話的！

跟住含住舊膠（俾醫生插內竅鏡用），過一陣，我就訓左lu。其間，我有D零碎片刻記得，如果你地試過被麻醉，就應該會有相同經驗，有D疑幻疑真、都唔知係咪夢片刻係腦中。我隱約記得嬸嬸推我返房後係我自已由手推床爬過病床的，但又好似無乜可能......

結果，yeah!!!又有粒新。又割左囉！又食2個禮拜藥，上年食到我入急症果隻藥，醫生話藥廠已經回收左，不過原因唔係令人頭痛，而係會令男人食完易有心臟病（一隻性別歧視的藥...）不過聽完都有D心寒

hehe...我仲係病房食雪糕添！仲叫護士姐姐幫我雪住先，遲D食！^__^